Bérlin’diki tayland elchixanisi aldida namayish ötküzüldi
10 – Iyul küni taylandning bérlindiki bash elchixanisi aldida tayland hökümitining uyghur musapirlirini xitaygha qayturup bergenlikige naraziliq bildürüsh namayishi élip bérildi.
Taylandning 100 din artuq uyghurni xitaygha qayturup bergenlikige naraziliq bildürüsh üchün gérmaniyining myunxén shehiridin 10 – Iyul seher yolgha chiqqan bir bölük uyghurlar 7 saet yol yürüp paytext bérlingha yétip kelgen we u yerdiki uyghurlar, türkler, kishilik hoquq teshkilatliri bilen birlikte tayland bash elchixanisi aldigha toplinip, saet 15:00 tin bashlap naraziliq namayishi élip barghan.
Tayland elchixanisi aldida namayish qilghan uyghurlar we türkler ayyultuzluq kökbayraq, türk bayraqliri hemde «tayland toxta! uyghurlarni xitaygha qayturup berme!» dégendek wéwiskilarni igiz kötürüp, jarangliq shuarlar bilen özlirining naraziliqlirini ipadiligen.
D u q rehberlirining bildürüshiche, qurultay rehberliri 9 – Iyul küni myunxénda tayland hökümitining uyghur musapirlirigha qollanghan gheyriy insaniy muamilisige qarshi namayish élip bérishtin ilgiri, taylandning bérlindiki bash elchisi bilen téléfunda körüshken. Tayland elchisi bolup ötken ishlardin özlirining yiterlik melumati yoqluqini, rast shundaq bir weqe yüz bergen bolsa, özlirining epsuslinidighanliqini, bu toghrisida tayland hökümet tereptin éniq bir uchurgha ige bolghandin kéyin, d u q gha melumat bérishni xalaydighanliqini bildürgen.
Bügün namayish neq meydanidin bizge melumat bergen d u q bash katipi dolqun eysa ependi aldi bilen bu qétimqi namayishning meqsiti heqqide chüshenche berdi. U yene sözide 10 – Iyul küni gérmaniyining bir qisim sheherliridiki türk teshkilatlirining öz aldigha uyushturushi bilen uyghurlarni qollap xitaygha qarshi namayishlar élip bériwatqanliqini eskertti. Bérlindiki namayishqa qatnashqan uyghurlardin bash shitabi myunxén shehiride bolghan yawrupa sherqiy türkistan birliki teshkilatining muawin reisi ekber ependimu öz tesiratini bayan qilip ötti. D u q muawin reisi esqerjan ependimu ziyaritimizni qobul qilip tesiratliri heqqide biz bilen ortaqlashti.
جاۋاب يېزىش